HATAW! D'yaryo ng Bayan hatawtabloid.com
TAMPOK muli ang pag-ibig sa pinakabagong vertical BL series ng Puregold, ang Got My Eyes on You, na mapapanood sa Tiktok simula Setyembre 3. Kasabay ng kapana-panabik na kuwentong enemies-to-lovers, itinatanong din ng serye: ipagpapalit mo ba ang pinapangarap na promosyon sa trabaho, para lamang sa pag-ibig?
Kilalanin ang mga tauhang nagnanais na maabot ang mga pangarap, at makararamdam ng kilig ng pag-ibig kung kailan hindi nila inaasahan.
Drew—Ginagampanan ni Mikoy Morales, ang masikap na operations manager ng villa, na inaasahang makapagpapatuloy ng pagpapatakbo ng mga bagay kahit gaano pa kahirap–katambal ng kape at mga gabing puyat na puyat. Isang taong tapat sa mga layunin, at sinisigurong maligaya ang lahat ng bisita sa villa.
Lumaki sa isang simpleng pamilya, natutong maging palaban sa buhay. Sa serye, kinakailangan niyang mamili—karera at personal na buhay, lalo’t pangarap niyang magkaroon ng sariling resort, at hakbang dito ang promosyon bilang general manager.
Shawn—Si Esteban Mara, ang nangagasiwa ng guest relations sa villa. Pulido at malinis ang estilo, at mayroong kalmadong presensiya. Mahiyain man sa umpisa, mapagmalasakit siya sa mga malapit sa kanya.
Isinilang sa marangyang pamilya, natutuhan niyang tumayo sa sariling paa sa murang edad. Ayaw niya sa small talk at mas gusto ang malalim na mga pag-uusap. Dahil sa kanyang pinaghalong kompiyansa sa sarili at sinseridad, swak na swak siyang karibal–o ‘di kaya, katambal–ni Drew.
Moira—Hannah Lee, ang masiglang accountant ng villa, ang nagpapatawa at nagpapakalma sa lahat. Prangka at maingay, hihilahin ka niya para magkape o uminom kung magulo na ang buhay. Isang tapat at mapag-arugang kaibigan, laging nandiyan si Moira para sa mga may kailangan sa kanya.
Kirk—Mula sa isang mayamang pamilya, si Kirk Puyat (Ady Cotoco) ay isang fashionista na nahumaling kay Wilfred. Sweet man, ang walang tigil niyang pagpapakita ng pagkagusto ay maaaring pagkamalang love bombing. Dahil sa kanyang charm at enerhiya, magkakaroon ng mga komplikado at kakaibang eksena kasama ang natitipuhang si Wilfred.
Wilfred—Darwin Yu, ang events coordinator ng villa, isang romantiko na kagagaling lamang sa masakit na hiwalayan, kaya takot nang umibig muli. Maaasahan at confident man sa trabaho, hirap siyang maghilom at humakbang pasulong mula sa nakalipas.
Trevor—ang general manager ng villa, si Trevor (Victor Sy), na nagsisilbing tatay-tatayan ng grupo. Mapagmalasakit at patas na boss, madali siyang makakonekta sa grupo dahil nagsimula rin sa pinanggalingan ng lahat. Mahal niya ang kanyang pamilya at pangarap niyang magretiro sa probinsiya kasama ang asawa.
Dahil sa mga makatotohanang tauhan at kuwela at kakaibang atake sa kuwentong karera laban sa pag-ibig, kaabang-abang ang BL seryeng Got My Eyes on You. Panoorin sa @puregoldph Tiktok page
