Joey at Alma napanatili ang pagkakaibigan

MA at PA
ni Rommel Placente

SA panayam pa rin ng Fast Talk with Boy Abunda kamakailan kay Joey Marquez ay nabanggit niya na maayos na maayos ang relasyon nila ngayon ng dating karelasyon na si Alma Moreno.

Kahit naghiwalay na, napanatili pa rin ng dating celebrity couple ang kanilang pagkakaibigan.

Sa katunayan, maituturing na rin nilang BFF ang isa’t isa dahil sa tagal na ng kanilang pinagsamahan lalo na bilang mga magulang sa kanilang mga anak.

Sabi ni Joey, “Kasi siguro, na-realize namin pareho, na kailangan i-consider namin ang mga anak namin. 

“Whatever na mag-away kami, maaapektuhan ‘yung mga bata. So what we did, sabi ko, ‘Hindi man tayo tumagal ng husband and wife, but we can be friends or best friend. 

“By doing that, para naman ma-compensate naman ‘yung lungkot ng mga anak natin na naghiwalay tayo,’” paliwanag pa ng mahusay na komedyante.

Sa ngayon ay may non-showbiz partner si Joey, si Malu Quintana, na na-meet na namin at gaya ni Alma ay maganda rin siya, huh!

Ayon kay Joey, ipinapaalam niya kay Malu kapag makikipag-usap siya kay Alma bilang respeto sa kanilang relasyon.

“Siyempre with due respect din. Respeto sa lahat. Kasi, siyempre, ‘yung ka-partner mo, huwag mo siyang iba-blind side, kailangan alam din niya, because that’s what partners are for,” paliwanag pa ni Joey.