Daniel gusto nang magkapamilya; nag-eenjoy sa farm

MA at PA
ni Rommel Placente

HABANG hindi pa pumapasok ulit sa isang relasyon si Daniel Padilla, ang hit teleserye na Incognito, na isa siya sa mga bida ang nagpapasaya sa kanya ngayon.

Sabi ni Daniel sa interview sa kanya ng Esquire Magazine, “Enjoy ako dahil I love what I’m doing now. Breath of fresh air talaga itong ginagawa kong ‘Incognito’. Before doing this, I was parang… nawalan na rin akong gana, eh. Lahat naman tayo sa trabaho natin, ‘di ba? We… burn out. Because of, you know, ulit-ulit. ‘Yan lang lagi ginagawa mo,” sey ni Daniel.

Dito sa Incognito na una niyang action serye, ginagampanan niya ang character ni Andres Malvar na isang dating scout ranger na dalubhasa sa CQC (Close Quarters Combat) at anti-guerilla warfare na tinanggal sa military service dahil sa kasong homicide.

Dagdag pa ni Daniel, “Suwerte rin ako na nabigay sa akin itong proyekto na ‘Incognito’. Breath of fresh air. Sarap niyong ginagawa ko ulit. Kaya after this, parang ang dami kong ideas sa mga next ko namang gagawin.”

Nakatutulong din sa kanya na umiwas sa ingay ng social media at ang mamundok sa Tanay, Rizal.

“Namumundok kami roon. Iba sa realidad natin,” sey niya.

Enjoy na enjoy nga niya ang katahimikan ng nature kaya plano niyang magkaroon ng quiet at incognito life.

“Bumalik sa nature kung saan simple ang mga bagay. Katahimikan, oras sa pamilya, para magdasal, oras para maglaro.

“Gusto ko lang mag-farm, may mga hayop na inaalagaan, may open space, maraming halaman, sariwang hangin,” aniya pa.

Enjoy rin siya sa pagiging ‘cool tito’ kay baby Claudio, na anak ng kanyang younger brother na si JC Padilla.

“’Yung bahay namin nag-iba kasi may baby na.

“Ngayon ko lang nakita ‘yung effect ng baby, lalo na sa mom ko. Jusko po, hindi na umaalis, hirap na hirap umalis, ayaw iwanan si Claudio!”

Dahil sa na-enjoy niya ang pagkakaroon ng baby ay dito na niya inamin na gusto na niyang magkaroon ng sariling pamilya.

“Wala na akong ibang pupuntahan pa. Gusto ko na rin buksan ‘yung chapter na ‘yon dahil minsan hinahanap na rin ang laman ko.

“Eventually, I am looking forward to having a family, ano pa ba ang gagawin ko, andoon na ako sa boundary?

“So pukpok muna sa trabaho, then eventually start a family.

“Wala na akong ibang pupuntahan. Most of my friends have families, nakikita ko na rin magkakalaro ang mga anak nila.”