HATAW! D'yaryo ng Bayan hatawtabloid.com
ARESTADO ang isang pulis matapos magpaputok ng baril sa Brgy. Tuao North, bayan ng Bagabag, lalawigan ng Nueva Vizcaya, nitong Linggo, 1 Enero, unang araw ng bagong taong 2023.
Kinilala ng Bagabag MPS ang suspek na si Pat. Loreto Abrio, 30 anyos, kasapi ng PNP-SAF na nakatalaga sa Lamut, Ifugao, at residente sa Mercedes, Eastern Samar.
Dinakip si Abrio matapos iulat ng isang concerned citizen sa pulisya na isang lalaki ang nagpaputok ng hindi matukoy na kalibre ng baril noong Bagong Taon.
Nasakote ng kapwa mga alagad ng batas ang nakainom na si Abrio sa labas ng isang videoke bar.
Nakompiska sa kanya ang kanyang service firearm, basyo ng bala ng kalibre 9mm, at magasin na mayroong 13 live 9mm caliber ammunition sa loob ng kanyang sling bag.
Nakatakdang isailalim sa paraffin test at ballistics test ang suspek na kasalukuyan nang nasa kustodiya ng PNP Bagabag.
