Arjo mabilis na umaksiyon sa mga nasunugan sa Bgy Balingasa

NAPAKA-SUWERTE ng mga taga-District 1 ng Quezon City dahil nagkaroon sila ng kongresistang mabilis umaksiyon. Ang tinutukoy namin ay ang aktor na si Arjo Atayde na agad sumugod sa Don Manuel, Barangay Balingasa nang malamang nasusunog ang ilang tahanan doon.

Walang takot na animo’y nasa isang taping lang si Arjo na umakyat sa bubungan ng isang bahay doon para masilip ang laki at lawak ng pinsala ng sunog. Ito’y ginawa niya habang may sunog. 

Dahil sa laki ng pinsala ng sunog sanhi ng faulty electrical wiring na mabilis kumalat sa may 700 kabahayan noong Setyembre 8, agad nakipagsanib-puwersa ang aktor/kongresista sa Department of Social Welfare and Development (DSWD) gayundin kay Quezon City Mayor Joy Belmonte para sa mabilis na pagbibigay-tulong sa mga apektado ng sunog.

Kaagad naipamahagi ang tulong kinabukasan sa mga taga-Barangay Balingasa sa pamamagitan ng DSWD. 

“It only took one phone call for DSWD Secretary Erwin Tulfo to respond,” ani Arjo. “President Bongbong Marcos have chosen an action man to head DSWD and we at the district could not thank him enough for his quick response.”

Nag-donate ang DSWD ng P5,000 cash assistance at relief boxes sa bawat pamilyang naapektuhan ng sunog samantalang regular na nirarasyunan ng team ni Arjo ang malinis na maiinom ng tubig ang mga ito. 

Patuloy din ang pag-uusap ng team ni Arjo at mayor Joy para sa mabilis na plano sa kung paano maitatayo o mabibigyan ng kabahayan ang mga naapektuhan gayundin ang patuloy na pamamahagi ng pagkain, tubig, at medisina sa bawat pamilya. (MVN)