HATAW! D'yaryo ng Bayan hatawtabloid.com
ISA-ISANG nahulog sa kamay ng batas ang anim na kalalakihang pinaghahanap ng batas at sinasabing pawang mga mapanganib na personalidad sa pinaigting pang kampanya laban sa krimen sa lalawigan ng Bulacan, nitong Lunes, 23 Mayo.
Sa ulat na ipinadala ni P/Col. Charlie Cabradilla, acting provincial director ng Bulacan PPO, kay P/BGen. Matthew Baccay, PRO3 PNP regional director, nakatala ang anim na arestadong suspek bilang most wanted persons sa Bulacan.
Kinilala ang mga nadakip na sina Lorenz Tacatani, 30 anyos, inaresto sa bisa ng warrant of arrest sa kasong Murder (RPC Art.248); Mark Alexis Caguinguin, 20 anyos, para sa kasong paglabag sa Section 5 at 11 ng RA 9165; Eleazar Vicente, 33 anyos, para sa kasong Attempted Murder; Michael Angelo Matias, 20 anyos, para sa kasong Murder; Lawrence Avendano, 24 anyos, may kasong Rape (RPC Art.266; at Sammy Dela Torre, 18 anyos, sa kasong Rape kaugnay ng RA 7610.
Napag-alaman, ang mga akusado ay nagtago matapos sampahan ng mga kaso kaya itinala bilang mapanganib na most wanted persons (MWPs) ngunit hindi sila tinantanan ng mga tauhan ng Bulacan police sa pagmamatyag hanggang isa-isang napagdadakip. (MICKA BAUTISTA)
