Alaskador na sekyu, binoga ng kabaro
PATAY ang isang sekyu nang barilin sa ulo ng kanyang kabaro dahil sa pagiging alaskador sa isang bodega ng bigas sa Tondo, Maynila nitong Sabado.
Kinilala ang biktima na si Steven Morales, 41, security guard sa RAN PMC Compound at residente sa St. Anthony Phase-2 A, Antipolo City.
Naaresto ang suspek na si Lemuel John Estrida, 29, residente sa Barangay Camangyanan, Sta. Maria, Bulacan.
Ayon sa ulat, nangyari ang insidente 7:10 pm sa loob RAN PMC Compound, sa No. 1613 A. Rivera St., corner Mayhaligue St., Tondo.
Nauna rito, nilapitan ng biktima ang suspek na naka-duty at ilang beses sinabihan nang “umayos ka malapit ka na sa akin!”
Matapos pagsalitaan ng biktima ang suspek, bumalik din sa kanyang assign post.
Ngunit napikon umano si Estrida sa tinuran ng biktima kaya pinuntahan sa kanyang puwesto saka pinagbabaril hanggang bumulagta.
Mahaharap si Estrida sa kasong murder.
