Killer ng online seller huli na

ARESTADO na ng mga awtoridad ang pangunahing suspek sa pagpatay sa isang online seller noong Lunes ng gabi sa Malabon City.

Kinilala ni Malabon police chief P/Col. Jessie Tamayao ang suspek na si Fernand Rafael, may mga alyas na Kevin Rafael at Balat, 26 anyos, helper sa Malabon Fish Port na naaresto ng pinagsanib na puwersa ng Sub-Station 5 at Special Reaction Unit (SRU) ng Malabon police dakong 12:00 ng tanghali kamakalawa sa kanyang bahay sa Gen. P. Boromeo St., Barangay Longos.

Ani Col. Tamayao, na-established ng mga imbestigador ang motibo ng suspek sa pagpatay kay Jerico Camino, 31 anyos, matapos niyang pagbabarilin kasama ang isang hindi pa kilalang kasabwat sa harap mismo ng kapatid ng biktima sa kanto ng Maya-Maya at Pampano streets, Barangay Longos noong Lunes, dakong 8:13 pm habang naghihintay ng kanyang online delivery para sa customer.

Napag-alaman ng pulisya na si Rafael ay nakulong kamakailan matapos maaresto at kinasuhan ng biktima ng robbery ngunit nakalabas matapos makapagpiyansa.

Sinubukan ni Rafael na makipag-areglo pero tumanggi ang biktima at sa halip ay itinuloy ang kaso dahilan upang patayin ng suspek si Camino.

Nadiskubre ng pulisya na si Rafael ay may standing warrant of arrest na inisyu ni Malabon Regional Trial Court (RTC) Judge Carlos Flores ng Branch 73 sa paglabag sa Section 10 ng RA 7610 o ang Special Protection of Children against Child Abuse, Exploitation and Discrimination.

Patuloy ang isinasagawang follow-up operation ng pulisya para sa posibleng pagkakaaresto sa kasabwat ni Rafael na nagsilbi umanong lookout sa pamamaril sa biktima.

(ROMMEL SALES)