HATAW! D'yaryo ng Bayan hatawtabloid.com
HINAMON ng Palasyo ang Makabayan bloc sa Kongreso na humakot ng suporta sa mga kapwa kongresista upang magtagumpay sa pagharang sa P16.4 bilyong pondo ng National Task Force to End Local Communist Armed Conflict (NTF-ELCAC) na tinaguriang ‘generals’ pork barrel’ para sa susunod na taon.
Inamin ni Presidential Spokesman Harry Roque na may kinalaman sa anti-insurgency campaign ang lahat ng proyektong planong tustusan ng P16.4 bilyong ‘generals pork barrel’ at balidong gastusan ito ng pera ng bayan.
“Ang pagkakaintindi ko po lahat po iyan ay projects related to the anti-insurgency campaign ng ating gobyerno and that’s a valid expenditure ‘no.
“In any case, hindi po para sa Makabayan bloc alone na kuwestiyonin iyan. Sana po makuha nila ang suporta ng mas maraming kasama nila sa Kongreso para po mawala iyang ganiyang entry ‘no,” dagdag niya.
Sa ginanap na budget hearing kamakailan, inihayag ni Bayan Muna party-list Rep. Carlos Zarate na kokombinsihin niya ang mga kapwa mambabatas na tanggalin ang P16.4 bilyong NTF-ELCAC budget.
Tinawag ni Zarate ang nasabing budget bilang pork barrel para sa mga retiradong heneral dahil pinapayagan silang gawin ang anomang naisin para gastusin ang pondo.
“Sila ang magse-certify. Sila magbibigay. Mas matindi pa ito sa pork barrel ng Kongresista. Magdi-dispense sila ng P20 million per barangay. Can you imagine that? Talagang pork ito in aid of whatever,” ani Zarate.
Mas mainam aniya kung ang mga regular na kagawaran ang mamamahala sa pondo o ilipat pandagdag sa pagtugon ng pamahalaan sa CoVid-19.
Giit ni Zarate, ang paglalaan ng P16 bilyon para sa NTF-ELCAC na tatlong beses na mas malaki sa budget para sa CoVid-19 programs ay hayagang pagpapakita ng totoong prayoridad ng administrasyong Duterte sa panahon ng krisis.
Para kay Roque, hindi nagbabago ang budget proposal ng Ehekutibo at ipauubaya ng Palasyo ang pagpapasya sa Kongrespo at hindi lamang sa Makabayan bloc.
“Pero as of now, that is the budget proposal coming from the Executive and we bow to the wisdom of Congress but not just to the Makabayan bloc,” giit ni Roque. (ROSE NOVENARIO)
