HATAW! D'yaryo ng Bayan hatawtabloid.com
NAKAPANGINGILABOT ang ibinunyag na drug matrix ng Pangulo.
Mantakin ninyong leader ng isang malaking sindikato ng droga ang pangalawa sa pinakamataas na opisyal ng Philippine Drug Enforcement Agency (PDEA) at mga miyembro niyang anim na pulis at anti-drug officials?!
Kaya msasabi talaga nating “shabu” is the root of all evils.
Nasisilaw sa laki ng ‘kuwartang’ iniaakyat ng shabu ang mga opisyal ng pamahalaan gaya ng isinasaad sa drug matrix na si Director Ismael Gonzales Fajardo, deputy director general for administration ng PDEA.
Kilalang-kilala umano si Fajardo sa drug community bilang scorer at recycler ng ilegal na droga at gumagawa ng mga kuwento tungkol sa kanilang mga illegal drug operation.
Kung matatandaan, si Fajardo ay sinibak sa puwesto ni PDEA Director General Aaron Aquino nitong 14 Setyembre, dalawang araw makaraan ang isinumiteng drug matrix kay Pangulong Duterte.
Miyembro ni Fajardo sina S/Supt. Eduardo Paderon Acierto, dating PNP anti-narcotics stalwart, at tumayong officer-in-charge ng nabuwag na PNP-AIDG na ang ilang tauhan ay sangkot sa pagpatay sa Korean national na si Jee Jick Joo sa loob mismo ng Kampo Crame.
Hindi siya nakasuhan noon alinsunod sa prinsipyo ng command responsibility matapos ipalusaw ni Duterte ang unit dahil sa nasabing insidente.
Kabilang din sa mga miyembro ni Fajardo sina S/Supt. Leonardo Ramos Suan, Supt. Lorenzo Cusay Bacia, Insp. Lito Torres Pirote, Insp. Conrado Hernandez Caragdag, at SPO4 Alejandro Gerardo Liwanag.
Batay sa matrix, si Fajardo ang nagtahi ng mga istorya sa likod ng isinagawa nilang drug operations sa iba’t ibang bahagi ng bansa.
Kabilang ang kaso nang pagdawit kay Marine Lt. Col. Ferdinand Marcelino nang paratangan nag-o-operate ng shabu lab sa Celadon Residence noong Enero 2016.
Ilan sa drug related raids na umano’y tinahi-tahi ni Fajardo at kaniyang grupo ang Valenzuela case, na dalawang Filipino-Chinese nationals ang inaresto dahil sa umano’y nasamsam sa kanila na mahigit 35 kilo ng shabu.
Pero lumalabas sa imbestigasyon na hindi pala nahuli ang dalawang Chinoy sa isang vehicle interdiction operation kundi dinukot sila ng grupo ni Fajardo sa isang warehouse sa Valenzuela at pinaamin na sa kanila ang nakompiskang ilegal na droga.
Nabatid din sa imbestigasyon na mahigit 55 packs ng shabu, katumbas ng 55 kilos ang ginamit na kontrabando laban sa hinuling mga suspek umano ngunit nabatid na kinupit nila ang iba at pinalabas na 36 packs lamang ang nakuha.
Sa kasalukuyan, nag-utos na ng imbestigasyon at lifestyle check sa mga opisyal ng PDEA at PNP na nasa drug matrix.
Sa pinakahuling balita, sina Fajardo at Acierto ay iniugnay rin sa nawawalang P6.8-B shabu sa magnetic filters sa warehouse sa Cavite, base sa Congressional hearing kamakailan.
Si Acierto rin ang nadawit noong 2014 sa nawawalang 900 high-powered firearms sa PNP.
Sana lang ay siguradong wala nang remnant na naiwan sina Fajardo sa loob ng law enforcement units sa bansa, dahil kung hindi tiyak na patuloy silang mamayagpag.
Kung maaaprobahan ang death penalty, palagay natin, ang mga katulad ni Fajardo ang dapat na unang patawan.
Para sa mga reaksiyon, suhestiyon, reklamo at sumbong, magtext sa 0977.705.22.31 o mag-email sa [email protected]. Para sa mga nakaraang isyu ng BULABUGIN please visit https://hatawtabloid.com
BULABUGIN
ni Jerry Yap
