Bebot, 10-anyos dalagita tiklo sa 1 kg shabu

NAKOMPISKA ng mga awtoridad ang isang kilo ng shabu mula sa isang 23-anyos babae at isang 10-anyos dalagitang lulan ng SUV sa checkpoint sa Saguiran, Lanao del Sur nitong Biyernes ng gabi.

Ayon kay Col. Joselito Pastrana, commander ng 65th Infantry Battalion, minamaneho ni Raihana Disalo ang Hyundai Tucson nang parahin ng mga awtoridad sa isang checkpoint sa Brgy. Pawak dakong 6:30 pm.

Sinabi ni Pastrada, nakita ng mga operatiba na inuupuan ni Disalo at isang dalagita ang plastic bags.

Nang inspeksiyonin, nakitang ang plastic bags ay naglalaman ng isang kilo ng shabu na nagkakahalaga ng P10 milyon.

Ayon kay Marlon Santos, operations officer ng Philippine Drug Enforcement Agency-ARMM, ang droga ay unang malaking bulto ng shabu na nakompiska sa Marawi City at Lanao del Sur.

Si Disalo at ang dalagita ay dinala na sa Cotabato City para imbestigahan.