HATAW! D'yaryo ng Bayan hatawtabloid.com
LUNGSOD NG PASIG — Ipinamalas ni mayoral candidate Ate Sarah Discaya ang kanyang pamumuno sa pamamagitan ng pagsuspinde sa kanyang ka-tandem na si Atty. Christian “Ian” Sia matapos umani ng batikos ang isang biro nitong itinuturing na misogynistic o mapanirang-puri sa kababaihan.
Hindi dumalo si Sia sa miting de avance ng Team KayaThis noong Sabado sa Barangay Pineda, bilang bahagi ng kanyang tatlong araw na suspensyon. Ang hakbang ay kasunod ng show-cause order mula sa Commission on Elections (Comelec) na humihiling kay Sia na magpaliwanag kung bakit hindi ito dapat kasuhan ng paglabag sa mga patakaran ng kampanya.
“Sinuspinde ng Team KayaThis si Atty. Ian Sia ng tatlong araw dahil sa kontrobersiyal na pahayag niya kamakailan. Habang siya’y suspendido, hindi siya maaaring sumama sa anumang aktibidad ng grupo,” ani Discaya sa isang ambush interview habang papunta sa kanilang kampanya.
“Pinayuhan ko siyang gamitin ang panahong ito para magnilay. Tao lang tayo—nagkakamali rin. Pero mahalaga ang pag-ako ng responsibilidad.”
Si Discaya, isang matagumpay na negosyante na ngayon ay tumatakbo sa lokal na pamahalaan, ay nakatawag ng malaking atensyon dahil sa dami ng taong dumalo sa kanilang kampanya—isang patunay, ayon sa kanyang mga tagasuporta, ng kagustuhan ng mga mamamayan para sa bagong liderato.
Kilalang “Ate Sarah” ng mga taga-Pasig, na may “H” para sa “honesty” ayon sa kanyang kampo, dala niya ang layunin na gawing isang modernong smart city ang lungsod gamit ang teknolohiya para sa kapakanan ng bawat mamamayan.
Kaugnay ng insidente, iginiit ni Discaya ang kahalagahan ng maingat na pananalita lalo na sa panahon ng eleksyon.
“Sinabihan ko siya na kahit walang masamang intensyon, dapat pa ring mag-ingat sa mga salitang binibitawan. Inamin naman niya ang pagkakamali at buong-loob niyang tinanggap ang kaparusahan,” dagdag pa ni Discaya.
Sa inilabas na show-cause order ni Comelec Task Force Safe head Sonia Bea Wee-Lozada, binanggit na ang pahayag ni Sia ay posibleng lumabag sa Comelec Resolution No. 11116 na nagbabawal sa diskriminasyon at gender-based harassment tuwing kampanya.
Kung mapapatunayang may sala, maaari siyang makulong ng hanggang anim na taon nang walang probation, habambuhay na ipagbabawal na humawak ng anumang posisyon sa gobyerno, at aalisan ng karapatang bumoto.
Sa kabila ng kontrobersya, nananatili si Discaya sa kanyang prinsipyo ng pagkakaisa at pag-unawa.
“Sa isang pamilya, may pagkakamali pero hindi ibig sabihin ay dapat talikuran ang isa’t isa. Ang mahalaga ay matuto tayo’t magsikap na maging mas mabuting tao,” pagtatapos niya.
