Inuman sa lamay nauwi sa isa pang paglalamayan
KUYA TINAGA NG KAPATID, DEDBOL 
BINAWIAN ng buhay ang isang 26-anyos magsasaka matapos tagain ng nakababatang kapatid nitong Lunes, 10 Oktubre, sa bayan ng Basey, lalawigan ng Samar.
Kinilala ang biktimang si Erwin Padoc at kanyang kapatid na suspek na si Merwin Padoc, pawang mga residente sa Brgy. Bulao, sa nabanggit na bayan.
Ayon sa paunang imbestigasyon, nag-iinuman ang magkakapatid sa burol ng isang kaanak nang magsimula ang kanilang mainitang pagtatalo hanggang tagain ng suspek ang kanyang kuya gamit ang mahabang patalim na tila espada, tumama sa kaliwang balikat at puwitan ng biktima.
Dinala si Erwin sa Basey District Hospital ngunit inilipat sa Eastern Visayas Regional Medical Center kung saan siya namatay habang nilalapatan ng lunas.
Samantala, nagsagawa ang mga tauhan ng Basey MPS ng hot pursuit operation upang masukol ang tumakas na suspek.
