Sa Candaba, Pampanga
5 KAWATAN NASAKOTE, 4 TINUTUGIS 
SA MABILIS na pagresponde ng mga awtoridad, nadakip ang limang lalaking nanloob sa isang grocery store at tumangay ng mga gamit at paninda sa bayan ng Candaba, lalawigan ng Pampanga, nitong Linggo, 2 Oktubre.
Batay sa ulat mula kay Pampanga PPO acting Provincial Director P/Col. Alvin Consolacion, dakong 1:00 am, nang magresponde ang mga tauhan ng Candaba MPS na pinamumunuan ni P/Lt. Col. Karen Clark, hepe ng naturang estasyon, sa itinawag na insidente ng panloloob sa isang grocery store na matatagpuan sa Candaba Public Market, Brgy. San Agustin, sa naturang bayan.
Bago makalayo, naaresto ang mga suspek na kinilalang sina Renneland Pangilinan, residente sa Brgy. San Agustin; Jonar Sibug ng Brgy. Pasig; Eric Pangilinan ng Brgy. Pasig; Lester Mangila ng Brgy. Buas; at John Henry Simbulan, ng Brgy. San Agustin, pawang sa Candaba, Pampanga.
Samantala, nagawang makatakas at patuloy na pinaghahanap ang mga kasabwat nilang suspek na sina Joshua Jurado, ng Brgy. San Agustin; Bill David Balagtas, ng Brgy. Dalan Laon Pasig, parehong sa Candaba, Pampanga; at dalawang hindi pa tukoy ang pagkakakilanlan.
Nasamsam ng mga awtoridad ang mga nakulimbat na mga gamit at mga paninda gayondin ang bolt cutter na ginamit ng mga suspek na kasalukuyang nakapiit sa Candaba MPS para sa patuloy na imbestigasyon at disposisyon. (MICKA BAUTISTA)
