INAASAHAN ng grupo ng mga taxi operator na aaprobahan ng Land Transportation Franchising and Regulatory Board (LTFRB) ang kanilang kahilingan na P20 dagdag para sa flag-down rate.
Ayon kay Philippine National Taxi Operators Association President Atty. Jesus Manuel Suntay, hinihintay nila ang desisyon ng LTFRB sa kanilang panukalang dagdag P20 flag-down rate ng pasahe sa taxi.
“Waiting tayo sa decision ng LTFRB and we’re very hopeful [dahil] reasonable naman ‘yung hinihingi ng taxi industry, ‘yung karagdagang P20 sa flag-down rate,” ani Suntay.
Kung maaaprobahan, ang flag-down rate para sa mga taxi ay tataas sa P60.
Sinabi ni Suntay, kailangan talagang taasan ng mga taxi operator ang flag-down rate dahil sa sunod-sunod na pagsirit ng presyo ng mga produktong petrolyo.
Aniya, ang limitadong operasyon at mga pasahero noong panahon na estriktong ipinatutupad ang mga protocols dahil sa CoVid-19 ay malaki ang naging epekto sa industriya ng pampublikong sasakyan.
Nangangamba ang mga operator na magpapatuloy ang pagtataas ng presyo ng petrolyo ngayong pagsisimula ng “ber” months.
Dagdag ni Suntay, konsiderasyon na ang nakalipas na pitong taon mula nang humingi ng dagdag pasahe ang mga taxi operator. (ALMAR DANGUILAN)
